អន្តរជាតិ៖ ការចាក់វ៉ាក់សាំងកូវីដ-១៩ សម្រាប់កុមារដែលមានអាយុពី ៥ឆ្នាំដល់ ១១ឆ្នាំដែលបានចាប់ផ្តើមនៅក្នុងរដ្ឋធានីហ្វីលីពីនកាលពីថ្ងៃចន្ទ ទី៧ ខែកុម្ភៈ ដោយនៅមជ្ឈមណ្ឌលចាក់ថ្នាំមានមនុស្សពាក់ឈុតជាតុក្កតា និងតួរឿងល្បីៗដើម្បីទាក់ទាញក្មេងឱ្យមកចាក់វ៉ាក់សាំង។

អ្នកនៅទីនោះមានទាំងអ្នកធ្វើប៉េងប៉ោងឱ្យក្មេងៗ ហើយអ្នកសំដែងក្នុងឈុត superhero បានថតរូបជាមួយក្មេងៗនៅកណ្តាលទីក្រុងម៉ានីល។

មកទល់ពេលនេះ រដ្ឋបាលចំណីអាហារ និងឱសថរបស់ប្រទេសហ្វីលីពីនទើបតែបានអនុម័តការចាក់វ៉ាក់សាំងវ៉ាក់សាំង Pfizer សម្រាប់ប្រើលើកុមារ។

រដ្ឋាភិបាលមានគោលបំណងចាក់វ៉ាក់សាំងដល់កុមារជាង ១៥លាននាក់។ ដំណើរការចាក់វ៉ាក់សាំងនឹងផ្លាស់ទីទៅតំបន់ផ្សេងទៀតនៃប្រទេសនៅក្រៅក្រុងម៉ានីលនៅថ្ងៃទី១៤ ខែកុម្ភៈ។

រហូតមកដល់ពេលនេះ ហ្វីលីពីនបានចាក់ថ្នាំបង្ការប្រហែលពាក់កណ្តាលហើយនៃចំនួនប្រជាជនសរុប ប៉ុន្តែតំបន់ជាច្រើននៅក្រៅតំបន់រាជធានីនៅតែយឺតយ៉ាវ ដែលធ្វើឲ្យមានភាពស្មុគស្មាញដល់កិច្ចខិតខំប្រឹងប្រែងដើម្បីទប់ស្កាត់ការផ្ទុះឡើងនៃមេរោគថ្មីៗ៕